ملعون سلامكم ياعرب

[nnm39]

عندما يكون السلام موقعا بدماء الشهداء 00 مع عدو لايعرف معناه 00 فيجب أن نرفضه 00 فأما سلاما بعد قوة وأما فلا 00

ملعون سلامكم ياعرب

ملعون سلام ماركة ( شالوم)00 فيه لما نصحى بعد نوم 00 نلقى العيال خالعه الهدوم 00 ومفكرين الموت لعب
ملعون سلام فيه اسرائيل 00 بالعه الجولان 00 شفطه الخليل 00 ومبلطجه فى صحرا النقب
ملعون سلام ويا (شارون )00ولا(باراك )ولا (شيمون) 00 مستضعفين شجر اللمون 00 ومولعين (غزه) بحطب
ياخوانا اصحو (م) العبط 00 وكفايه نمشى فى الغلط 00 هو سلام العم سام 00 ينفع أمان لو يوم شطط
ينفع ننام 00 جنب لئام 00 يطيروا لنا جوز حمام 00 ويقطعوا فينا حتت
دى الحرب دى الوقتى وجود 00حرب ورثينها جدود 00 موش ع المياه ولاكوم زلط
دى الحرب موش بس البارود 00نقتل ونضرب بالجنود 00 أو حرق كم نخلة وسبط
أصل اليهود هم اليهود 00 من عهد (موسى )والجدود 00 ذى القراض فينا شبط
يارب وعليك العوض 00 ماعدش فاضل فى العرب 00إلا الجبان وابن اللى باعها من زمان 00 وابن أميه وبو( لهب)
معدتش بتجيب البطون 00 إلا الجبان واللى يخون 00 واللى سلاحه الخطب
معدش فينا (المعتصم) 00ولاحد بعده يوم رسم 00 خط لــ (كافور)00 إن داسه يبقى فى القبور00 من بعد مايشوف العجب
ولا(صلاح )وقت الفلاح 00لما ينادى يقول سلاح 00 أمر ينفذ قد وجب
كل بلاد المسلمين 00 إن كان أمير ولاغفير متشتتين 00 حتى فى هلال شهر رجب
ياكل حكام العرب 00 هى الجيوش 00 موجوده مخصوص للعروش 00 ولا لرد المعتدى
وإن كان سكوتنا بأمر( بوش) 00 فاكرينه أنه راح يحوش 00 رفس الجحوش 00 يبقى عادى
والله من غير النعوش 00 إن كان ضنايا 0 وابن جارى ولو مالوش 00 تبقى بضرب الأيادى
حتقولوا أيه لربنا 00 لما التاريخ يسبنا 00 لما جهنم تنحمى على اللى ضيع قدسنا
حتقولوا مين فينا السبب 00 اللى نسى فعل الرجال 00 واكتفى بس انه شجب
ولا اللى قال ولا زمان 00 وفش غله فى الخطب 00وفاكر إنه يوم كتب 00
بعد الصريخ 00 أقوى تاريخ 00 ناسى بإنه فى أيد (شارون) 00 زى الحلاوه واللعب
وفى ليله مطلعش قمر 00مين فيكوا بس اللى أمر 00 إن كان عقيد ولاعميد ولاشويش من غير رتب
بعد استخاره (كونداليزا) 00 وميت سيجاره وكاس و( جوزه )00 من بعد مارقصت (عزيزه )00 قال السلام ياهل العرب
ونده ياساده الوزير 00 قاله عايز ميت غفير 00 متأسسين رز وفطير 00 متبندقين وقت الخطب
ووقت مانقول السلام 00أوعى اللى نقط بالخصام 00 أو سب أخوه فينا وقام 00 يعمل لى تكشيره وصخب
وفى قمته رفع الإيدين 00عبد السلام وأخوه (ياسين) 00 والباقى وافق بعد حين 00 أحسن يقولوا إحنا السبب
أيوه السلام 0 يعنى شالوم 00 أحلى نهايه واللزوم 00 نفسه الحكايه تنشطب
ياعم (عربى) والنبى 00 سلام لمين يا(غبى) 00 للى صلب جسم (المسيح) 00 ولا االلى دبحوا الميت (نبى)
ماكفايه شجب وفرقعه 00 وإعلانات مشخلعه 00 باسم الأخوه والاتحاد 00 والناس هدومها مولعه
ياخوانا دا حرام العويل 00 كتر الدعا يحيى اسرائيل 00 وكلامنا أصبح مسخره
وهو انتوا شفتوا اللى جرى 00 بعد سلامهم ( مجزره 00) وبضغطه من ذر الريموت 00 خلوا بيوتنا مقبره
وفى كل ثانيه يفوت تابوت 00 ماشى عليه العنكبوت 00 سايب وراه طفل ومره
ياكل (حكامنا العزاز) 00 مبروك عليكو الإمتياز 00 فى الشجب ومعاهده موفاز00 ونسيتوا إنه اللى خرب
ملعون جيوشكم ياعرب 00 إن كان عقيد 00 ولاعميد ولا شويش من غير رتب
شى الله ياسيدنا الأسد 00هى( الشولان) من غير طوفان00 بعد شهور راح تنولد
ولا (الشالوم) 00 فاكره فى يوم 00 من غير عصايه وألف لوم 00 فعلا يرجع لك بلد
عيب ع الأسود لما القرود 00 تدخل تطرطر على الحدود 00 تتعشى فى بيت الأسد
ياعم ماكفايه الشخير 00 أصبح مرادف للزئير 00 ولا أنت خايف م الحسد
ياخوانا اصحو 00 أصل إسرائيل 00 متحضره لكوا وجايبه فيل 00 للكعبه جابت إبرهه
وإن كنتوا حتقولوا الدليل 00 شوفوا العلم الشط (نيل) 00 و(فرات )عليه شجر النخيل00 و(دجله) جاى بعدها
شوفتوا كلام العم بوش 00 حالف براس أبوه ماحوش 00 إلا مانشرب دمها
صورنى قال شايل شاكوش 00 بضرب يهودى فى وسط حوش 00 برهب حبيبة أمها
علشان بنطلب بالقانون 00 حق الغلابه من شارون 00 ربط دراعى وجاب له هون 00 وقاله كسر عظمها
دمر لى أشجار الليمون 00حرق الزتون 00 ساق الهباله ع الجنون 00 طاح فى البلاد دى كلها
واقف مابينا كأنه غول 00 أونسل من نسل المغول 00إن مره جربت الأصول 00 يزغرلى ويعلى صوته
ياسيدى استحمل( شارون) 00 إن مد إيده ودب هون 00 ياعم مانت اللى عاديتوا
وفيها أيه لوجاب قدوم 00 ودغدغ الحيطه فى يوم 00 ياعم بيوسع بيتوا
وإن مرة قلت إن اليهود 00 دبحونا ياولاد القرود 00 يجرى ويرفعها( فيتو )
ياكل حكام العرب 00 إجمعوا لجل النبى 00وإن كان فراقكم بأمر (بوش) 00 من أولى تبقى للنبى
ياكل حكام النفاق 00 شوفتوا العراق 00 فى لحظه عادت كربلاء 00 للدبح والقتل وجب
لو كنتوا يومها قولتوا ( لا) 00 أمريكا دى ( أس) البلاء00حتحول الدنيا ترب
كنتم حقنتوها دماء 00 صونتوا الكرامه (لأبو العلاء )00 بدل البيوت ماتتخرب
واتحدى إن جبتم دليل 00 أوشوفتوا مره (عذرائيل )00 فى البصره أو (شط العرب )
لكنه عايش فى اسرائيل 00 وفى كوريا 00وفى صحرا النقب
واتحدى إن كان فى العراق 00 أى سلاح غير النفاق 00 و(فياجرا) تنشيط للركب
لكن عشان نجمة( داود)00دمر لى صواريخ الصمود00 اتحججوا إن الواد (صدوم ) 00عامل فتوه ع العرب
راشش كيماوى فى الشمال 00 والكل هارب فى الجبال 00 وبرده ولع فى الحطب
دخلوا عليه وفى يوم جابوه 00 عدموا الحفيد والواد وابوه 00 وفى عيدنا باركوا المشنقه
وسابوها لينا معلقه 00 لجل السكوت 00 لجل موافقه للطاغوت 00 وقت اللزوم من غير بكى
وانت (ياعم أحمد 0ياغيط )00 موش مره من أجل (الكويت) 00 قلت لعيالى إنى نويت 00 أنصر أخويا اللى اغتصب
يومها ناديت 00 فى كل (مصر) وكل بيت00 واجب علينا ولو نسيت 00 أفكرك ياما انطلب
ياعم كان واجب مشيت 00 لــ (غزه) بينا وبينها حيط 00ولاعشان فقرانه زيت 00 سبتوا عيالها تنضرب
لكن عشان عيون ( شاليط) 00 قلنا لــ (هنيه ) إنت عبيط 00 والله لو بلعك محيط 00 أو حتى بيتك اتخرب
راح نقفل الباب الوسيط 00 واحنا انطرشنا لوناديت 00 وإياك تقول (أنفاق ) بنيت 00 بكره أهدمه وقت الغضب
وياخوانا يا (أهل الجنوب) 00 ماتقولوا من أمتى اليهود 00سابوا أرضكم
سابوا ( جنوبكم ) بالسلام 00ولا بتربية حمام 00 ولا بفرقعة الكلام 00 ولا جهاد من شعبكم
سابوا (جنوبكم) لما قام 00 الكل يضرب فى اللئام 00 بالجزمه وبفردة حزام 00 من عزمكم
يومها اليهود00 سابوا البارود00 وامريكا والغرب اتحد 00
لجل اليهود الكل جاى 00 جاى للمشايخ والعمد 00 ومسالمة الشاطر ( حسن)
عارف بإن المسلمين 00 نطقوا الشهاده اجمعين 00 والنصر يالجنه سكن
باسم الإله موش أمر( بوش) 00 ولاوزيره بدون رموش 00 نصرالإله ده له تمن
يا (غزه) لازم من تمن 00 تمن الخيانه موش فلوس00 تمن الخيانه بالنفوس
ودبابات فوقنا تدوس 00 من كفره وولاد المجوس 00 ونقول قدر من ربنا
ماهو كل شعارات الديوس 00 يحيا الجاسوس 00 يحيا اللى موت شعبنا
يا(غزه) بكره النصر جاى 00 جاى بالتهانى وألف ناى 00 يعزف أغانى عزنا
يا(غزه) أيه يعنى نموت 00 ولاالبيوت0 ولايعدى ميت تابوت 00 ماهو نفنى وتعيش أرضنا
ودعانا دايما فى القنوت 00 إن الإله يعزنا 00 ينصر ولادنا على اسرائيل 00 والقدس يوم ترجع لنا
لكن السلام فى الوقت ده يذلنا 00ولاحلمنا إن الرجوع 00 سابقينه بالسجدة وركوع00 ومفرطين فى عرضنا
ويا(غزه )00موش مستعجلين 00من عام تمانيه واربعين 00 متفرقين فى شملنا
وشفنا ياما (دير ياسين) 00 وفى ( قانا) وفى بلدة ( جنين) 00 أحزان كتيره تضمنا
يا(غزه ) صابرك مشتاقين 00 من قبل 0 قبل ( أحمد ياسين ) 00 رافعين إيدينا لربنا
يجمع قلوبنا على اسرائيل 00فى كل وقت وكل حين 00 زى ما ( دينا ) قلنا
بالإعتصام المجد يوم يرجع لنا 00 وإن جنحوا يومها للسلام 00 بعد مايرجع حقنا
أهلا بتوقيع السلام 00 ولو حتى شاربين دمنا
وتأكدوا النصر جاى 00 والقدس راح ترجع لنا
والقدس راح ترجع لنا 0000000000000000000
-----------------------------------------------------------------------------------------------------------
بقلم / إبراهيم العدل

[ssalloma]

العزيز الغالي / إبراهيــم العــدل



صدقـــت وصـــدق لســـانك وقلمـــك أيها المبدع



تحياتي وتقديري أيها الغالي

[هشام زايد]

شى لله يا الغزاوية
يا وجع الأمة العربية
لا انتو حماس
و لا عباس
فلسطين..هي القضية
شى لله يا الغزاوية

شى لله و على دلعونا
حكمونا ولاد الملعونة
والآخر خانم و باعونا
للنخاس والصهيونية
شى لله يا الغزاوية

شى لله وانتوا لوحديكو
الله ينصركو ويهديكو
ويدمر دولة أعاديكو
والأيام أهي رايحة وجاية
شى لله يا الغزاوية

شى لله ولا عادش رجوع
ويالخاين والجربوع
الأطفال ماتت م الجوع
والعطشان مش لاقى الميه
شى لله يا الغزاوية

شى لله على أحلى كلام
ناس تصحى
والأمة تنام
يعنى قفاك يصبح قدام
يا العربى
وتركب عربية
شى لله يا الغزاوية
كلمات الشاعر احمد فؤاد نجم
==========================
مهو يا شاعرنا ما ينفعش ارد بحاجه من عندى
على الكلام الكبير قوى
انا قرات لحضرتك فى بعض ردود ك بالعاميه
واعجبتنى جدا ولكن لم اتخيل انك بارع فيها لهذه الدرجة الكبيره
يا شاعرنا الصادق انتا صادق فى كل ما تقول
وجياش وصاحب لغة
بوركت اينما كنت
اتمنى ان تتقبل مرورى
ودام صوتك شعرا
ودامت حياتك عطاء وخير ا

[هانى الزينى]

والله كا ما ادخل واقرا قصيدتك الجميله المعبره البسيطه الناريه

القانى عاجز عن التعبير

صدقنى مش عارف اكتب كلمه تعبر عن اللى جوايا ان كانت شعر او حتى نثر

طيب ايه الكلام اللى يعبر عن المشاهد المأساويه اللى بنشوفها غير

حسبنا الله ونعم الوكيل

لك الله يا غزه

[هانى الزينى]

صدقت والله وان كانت الجمله بلغة السؤال

فهى الاجابه بأم عينها

ياكل حكام العرب 00 هى الجيوش 00 موجوده مخصوص للعروش

[mostafa_2009]

الف مليون شكر لك واصل ابداعك

[nnm39]

المشاركة الأصلية كتبت بواسطة ssalloma

العزيز الغالي / إبراهيــم العــدل



صدقـــت وصـــدق لســـانك وقلمـــك أيها المبدع



تحياتي وتقديري أيها الغالي

----------------------------------

أشكر لك زيارتك التى تزيدنى حماسا وتواصل معكم أيها العزيز / إسلام 000 دمت ودامت زيارتك الرائعة 00
أخوك إبراهيم العدل

[nnm39]

المشاركة الأصلية كتبت بواسطة هشام الشااااعر

شى لله يا الغزاوية
يا وجع الأمة العربية
لا انتو حماس
و لا عباس
فلسطين..هي القضية
شى لله يا الغزاوية

شى لله و على دلعونا
حكمونا ولاد الملعونة
والآخر خانم و باعونا
للنخاس والصهيونية
شى لله يا الغزاوية

شى لله وانتوا لوحديكو
الله ينصركو ويهديكو
ويدمر دولة أعاديكو
والأيام أهي رايحة وجاية
شى لله يا الغزاوية

شى لله ولا عادش رجوع
ويالخاين والجربوع
الأطفال ماتت م الجوع
والعطشان مش لاقى الميه
شى لله يا الغزاوية

شى لله على أحلى كلام
ناس تصحى
والأمة تنام
يعنى قفاك يصبح قدام
يا العربى
وتركب عربية
شى لله يا الغزاوية
كلمات الشاعر احمد فؤاد نجم
==========================
مهو يا شاعرنا ما ينفعش ارد بحاجه من عندى
على الكلام الكبير قوى
انا قرات لحضرتك فى بعض ردود ك بالعاميه
واعجبتنى جدا ولكن لم اتخيل انك بارع فيها لهذه الدرجة الكبيره
يا شاعرنا الصادق انتا صادق فى كل ما تقول
وجياش وصاحب لغة
بوركت اينما كنت
اتمنى ان تتقبل مرورى
ودام صوتك شعرا
ودامت حياتك عطاء وخير ا

-----------------------------

أخى العزيز / هشام الشاعر
كل الكلمات التى أرسلتها إليك والتى لم أرسلها لن تعبر عن أخوتى لك وأنا أتشرف بزيارتك دائما وياعزيزى عندما تأتى إلى ورقتى المتواضعة بالعملاق أحمد فؤاد نجم فهذا تكريم منك قى حد ذاته 00 مشكور أخى الغالى دمت ودامت أعمالك الرائعة
أخوك / إبراهيم العدل

[nnm39]

المشاركة الأصلية كتبت بواسطة هانى الزينى

والله كا ما ادخل واقرا قصيدتك الجميله المعبره البسيطه الناريه

القانى عاجز عن التعبير

صدقنى مش عارف اكتب كلمه تعبر عن اللى جوايا ان كانت شعر او حتى نثر

طيب ايه الكلام اللى يعبر عن المشاهد المأساويه اللى بنشوفها غير

حسبنا الله ونعم الوكيل

لك الله يا غزه

----------------------------------------

الأخ العزيز / هانى الزينى
كل الكلمات التى كتبناها شجبا والعبارات التى ناديناهم نصرا والصور التى رفعناها وجعا لقلوبهم لاتكفى فياأخى هم كالحجارة أو أشد قسوة وإن من الحجارة من تسقط من خشية الله وتتشقق ويخرج منها الماء 00 أخى الرائع أنا محظوظ والله بكم إذ أجدنى أتحدث وأقرأ لأحباب مثلكم هذه الأعمال الرائعة 00 مشكور أخى العزيز على الزيارة الرائعة ولاتنسى الدعاء لإخواننا فى غزه
أخوك / إبراهيم العدل

[nnm39]

المشاركة الأصلية كتبت بواسطة mostafa_2009

الف مليون شكر لك واصل ابداعك

------------------------------------
الأخ العزيز / مصطفى
لايسعنى إلا الشكر لك ولقلمك الرائع الذى خططت به حروفا وردية المحبة 00 دمت أخى ودامت مودتك واعتزازى بزيارتك 00
أخوك / إبراهيم العدل

[alimahmed]

شكراااااااااااااااااااا