قـــــــــصــــــــــتــــــــــي مع الـــــــــــــز مــــــــــــــــــن هــــــــــنا .....

[Mr.Mostafa]

السلام عليكم ورحمة الله وبركاته

حبيت يا اخواني واخواتي الاعزاء ان اكتب قصتي هذه للعبره لبعض الشباب , يمكن البعض منكم ينصدم

لكثرة المشاهد التي حصلت لي مع مرور الزمن ولكن الحمدلله تركتها عن قناعه ,

البدايه :

تعرفت على شباب بالحاره وكانوا بالبدايه طيبين بمعنى الكلمه , دخلت قلوبهم من اول مره واخترت اني

اكون معهم واخذو رقم جوالي وصارت صداقتنا قويه , وبعد فتره جاني اتصال من واحد منهم :

الو السلام عليكم

ابن سلمى

كيف حالك

انت بالبيت

قلت

ايه بالبيت

قال تخاوي <<يعني تروح معنا

قلت وين

قال للبر نغير جو الشباب مجتمعين هناك

قلت اوك اروح معك

قال ربع ساعه واكون عندك

قلت تم



جاني ورحت معه ووصلنا للشباب وهو يضحكون ويهسترون , المهم نزلت وسلمت على الشباب وجلست

معهم , تقهويت وقعدنا نسولف , ناظرت لاثنين من الشباب جالسين بالسياره قلت بقلبي وش يسوون ,

فجئه نزلوا من السياره الا ومعهم صحن مو كبير متوسط تقريبا ونزلوه بالنص استغرب , سئلت خويي

الي بجنبي قلت وش هذا قال ( زقارة حشيش ) قلت لا لا فكنا ما اعرف السوالف , قال خذ مجامله قلت

لا مجاملا ولا هم يحزنون , قال اجل اسمع نبي نستأذن ونقولهم نبي نروح نطعس ونجي قلت ايو الله

تكفى , قام خويي قال على أذنكم وقمت معه قالوا وين تبون تروحون قال خويي قريب نبي نجرب الطعس

, ركبنا السياره قلت لخويي طلبتك لا ترجع ثاني مره لهم , قال انا ماتوقعت انك تخاف لهذه الدرجه ,

قلت اخاف ليش لا لعنبو بليسك حشيش مره وحده , ورحنا وطعسنا ورجعت للبيت , نسيت السالفه

مع الوقت


وبعد فتره اتصل علي نفس خويي قال ابي اروح لجبه تخاويني ؟

قلت ليه وش عندك هناك

قال والله معزوم عند رجال شرواك

قلت شرواك الطيب اوك اروح <<<<<<<<< من الطفش

رحنا وياليتنا ما رحنا

جينا جبه ونزلنا عند واحد بالبيت بس والله رجال بمعنى الكلمه جلسنا وتقهوينا وتعشينا الوكاد فلة حجاج

قال واحد يسولف على خويه : الشباب مسوي تحدي بالطعس وش رايك نروح هناك ,

خويي سمع السالفه قمز قال وين الطعس براسي الين كفرات الموتر قالها وهو يضحك , قالوا خلونا كلنا

نروح , مشينا وجينا الطعس الا عالم وناس كثيرررر ,

هالحين الحظه الحاسمه :

طعسنا وتونسنا وجلسنا شوي بس علشان يبرد الموتر , شوي والا هذا المطفوق وشكله معطيها يعني

شارب خمر , قام يفحط علينا قام خويي وراح له وقال سلامااااااات وشبك تفحط , قال مشتهي افحط

عليك فيه شي , رحت انا وثلاثه معي من الجالسين اهل جبه وخذينا خوينا والا وهذا يتكلم ويسب , قال

خويي والله ما اروح لين اخذ حقي منه , قال واحد من الموجودين خله يارجال هذا سكران , راح ابو

الشباب ( السكران ) قال خويي ما به مجاليس نبي نروح لحائل , قالوا اخوياه لا يهمك هذا سكران

امش معنا انت وخوييك نكمل السهره بالبيت , رفض خويي ومشينا من النفود ويوم جينا عند مخرج جبه

الا والدوريات والشرطه مطوقينا , نزل العسكري وقال انزل انت وخويك من السياره قال خويي وش

السالفه قال العسكري بعدين تعرف , شوي والا خويا خويي جايين ومسكوا العسكري على جنب

وتكلموا معه اما العسكر الباقين جالسين بسيارتهم , خويي شاف المنظر قال اهلنا بحائل وحنا بجبه

هالحين نأكلها هوااا , قلت وش الحل , قال هالحين اقولك , شغل الدبل وطلعنا فوق الرصيف وانطلقنا

من عندهم , شوي الا واسمع طلق رصاص من العسكري والدوريه ورانا , قال خويي والله لو يفجر

الكفرات كلها , الطلقه الثانيه جت بالكفر , يوم شاف خويي الدعوى كذا نزل عن الزفلت ومسكنا النفود

وتعلقنا هناك , هذا بعد ما تركنا الدوريه نبعد عن جبه , نزل خويي وشاف الكفرات حصل اثنين رايحه

فيها من الرصاص , جلسنا بالنفود يوم كامل من الساعه 2 الصبح الى الساعه 4 العصر لين جاء

فرج من الله وحصلنا جوال وكلمنا الشباب بحائل علشان يجون يسعفونا , جيت البيت وانا مرهق ورايح فيها

وقلت بنفسي يارجال اذا هذي اولها تنعاف تاليها , خليت الشباب وتوظفت وصار جدولي اليومي من

الدوام الى البيت ومن البيت الى الدوام هذه حقيقة قصتي المؤلمه في هذا الزمن ,,

تقبلوا تحياتي