أساسيات تركيب الأطباق الثابته

[م. محمدالشحات]

اسرار_التركيب للاطباق الثابته
حنرجع لتركيب الاطباق الثابته وحنشرح الاسس اللي لازم تكون عارفها علشان تقدر تركب الطبق وعليه عده عدسات لالتقاط عده اقمار لو قطر الطبق يسمح بكده.
قبل ما تتطلع تركب لازم تكون مجهز الهوم وورك بتاعك عشان متتطلعش علي الفاضي وتنزل بخيبه امل....طيب ايه هو الهوم ورك....اهم شيئ هو انك تكون عارف اقوي تردد واضعف تردد لكل قمر من الاقمار اللي انت عايز تركبها وكمان تكون متأكد أن قطر الطبق بتاعك مناسب لاستقبال هذه الاقمار واخيرا اكون عارف الاتجاه التقريبي لقمر السنتر اللي انت عايزه.
المعلومه المهمه جدا اللي لازم تعرفها ان اعلي ميزان قمر في مصر واللي بنسميه قمر منتصف القوس هو قمر عرب سات ٣٠.٥ شرق كل ما تنزل شرق او غرب الاقمار ميزانها يوطي بالتدريج يعني ٢٦شرق اوطي من ٣٠ شرق و٢٣ شرق اوطي من ٢٦ شرق و هكذا ٣٩ شرق اوطي من ٣٠شرق و٤٢ شرق اوطي من ٣٩شرق وهكذا.
السر بقي في تركيب الاقمار علي مساطر ان الحدوته دي بتتعكس.....ازاي يعني...حنشرح
حنفترض انك ركبت طبق متر واستقبلت الاوربي سنتر وعايز تركب استرا ١٩ وبدر ٢٦ وكمان عايز تركب ٧ شرق والنايل سات. شوف يا سيدي الشرح حيكون علي اعتبار انك واقف امام الطبق وحنبتدي نركب استرا ١٩....حسأل نفسي سؤال...لو عايز استقبل استرا ١٩ سنتر ححرك الطبق ازاي؟ححرك الطبق يمين ناحيه الشرق يبقي لما حركبه علي مسطره العدسه حتبقي شمال الاوربي(العكس يعني )الحاجه التانيه انهي قمر اعلي من التاني في قوس الاقمار؟بالقاعده اللي شرحتها فوق يبقي استرا ١٩ شرق ميزانه اعلي من الاوربي ١٣ شرق...تمام يبقي حعكس الوضع علي المسطره وتبقي عدسه استرا اوطي من عدسه الاوربي ححط اعلي تردد للقمر علي الريسيفر وابتدي احاول استقبله واحرك العدسه علي المسطره يمين وشمال وورا وقدام سنه سنه لحد ما القط الاشاره وابتدي احسن الاشاره بشتي الطرق الممكنه لحد ما اوصل لاعلي اشاره ممكنه علي القمر وطبعا لو قدرت استقبل اضعف تردد علي القمر بأي اشاره معناه ان استقبالي جيد واني حقدر استقبل معظم القمر ويعدين اربط واثبت العدسه جيدا وانتقل إلى القمر اللي بعده اللي هو بدر ٢٦شرق وده حيكون طبعا شمال استرا واوطي منه بتطبيق نفس القاعده.
طبعا لما حنيجي نركب ٧شرق والنايل سات ونطبق نفس القواعد حيبقي ٧ شرق يمين الاوربي واعلي منه وبعديه يمينه النايل سات واعلي منه.
محتاج تستعمل عدسات محترمه مشهود لها بالكفاءة لتحسين استقبالك ومحتاج تتحلي بالصبر محدش نزل متعلم. الصوره المرفقه فيها يوتل ١٦ شرق سنتر اذا كنت فهمت الشرح حاول تقول لنا ايه الاقمار الاربعه التانين اللي راكبين على الطبق.
ارجو ان اكون نجحت في توضيح الموضوع للمتابعين والي بوست قادم من اسرار التركيب اتركم في رعايه الله وامنه والسلام عليكم ورحمة اللة وبركاته.