في المعتقل
في المعتقل
فى المعتقل يا سلام سلم
موت وأتالم
لكن لمين راح تتظلم
والكل كلاب
كلاب حراسه
وكلاب صيد
واقفين بالقيد
يكتفوا عنتر وأبوزيد
ويهينوا دياب
الكلب فيهم لايميز
ولا تممييز
عن الغوريللا
ومطيز
وبضفر وناب
ومدربينه يدق الكعب
فوق راس الشعب
يزرع ف قلبه الخوف
والرعب
من غير أسباب
غير أن شله حراميه
وشمحطيه
عايشين فى مصر عواطليه
وبياكلوا كباب
عايزين يعيشوا
عرض وطول
على كده على طول
وأن حد بلضم
سيدنا يقول جريه ياكلاب
ع المعتقل
يرموه فى ألضيق
ما يلاقي صديق
واداره
شغلتها ألتلفيق
تكتب له جواب
وع النيابه ومحاكمه
وتقول حاكمه
ما دام بلدنا بلد بكمه
عاش ألكداب
غير ألصحافه ما تهول
بقي وتاول
وبعد ما ألكداب يطول
تطلع فى كتاب
لكن يا مصر حييجي أليوم
ويطير ألنوم
وكل ظالم أو مظلوم
حيكون له حساب
احمد فؤاد نجم
معتقل القلعه / 15 مايو 1969
|