[hallacd]

نزغ الشيطان بينه وبين أخيه ونسي أن العمر يمضي وكل شيء إلى زوال وأن خيرهما الذي يبدأ بالسلام



الناس واجد مير ما مثل الأخوان .... ما مثل أخوك اللي يحبك و يغليك

ما مثل أخوك اللي صدوق ومعوان .... تفديه بالغالـي وبالـروح يفديـك

يشكي لك جروحه وهمه والأحزان .... ولا ضاقت الدنيا بهمك يواسيـك

لو كان لك ربعٍ ونـاسٍ وجيـران .... ما مثل أخوك اللي عن الناس يغنيك

أخوك هو عزك ولو كان ما كـان .... يبيع كل الناس لأجلك ويشريـك

أنا أشهد أنه لك على الصدر نيشان .... تاجٍ على راسك وستـر يغطيـك

وأنا اشهد انه مـا يثاقـل بميـزان .... مثل الذهب والماس مافيه تشكيك

وأنا اشهد إنه ما يقـدر بالأثمان .... عن العدو حصـن ودرع يوقيـك

إياك لا تفتـح طريـق لشيطـان .... بينك وبينه جعـل ربـي ينجيـك

ولا تستمع لاجاك فلان و عـلان .... يا كثر ما تسمع من اللي يعاديـك

ولا تجعل لغيرك على العقل سلطان .... ترى كثير اللي بشـوره يدهويـك

ترى الدهر دوار يا سرع الأزمـان .... يومٍ تواريـه الثـرى أو يواريـك

تقول يا ليت الذي كـان ماكـان .... يا ليتني بالقبر جنبـك واخاويـك

يا ليتك تعود وأضمك بالأحضان .... أضمك لصدري واقبـل أياديـك

يا ليتك تعود ترى القلـب ندمـان .... وده يسوق المعذرة ثـم يراضيـك

مير البلا يا ليت مـاردت إنسـان .... ويا ليت ما تمحي ظلام بماضيـك

تماكن الدنيا وواصـل بالإحسان .... قبل الندم يطويك والهـم يبريـك

ونهاية المشوار ما غيـر الأكفان .... ويبقى مع السارين ذكرك وطاريك