المهندسين العرب - دعاء حمدان خلاص يا بلدى

السلام عليكم ورحمه الله وبركاته

دعاء حمدان خلاص يا بلدى

خلاص يا بلدى مبقاش جوانا خوف
بقيت قلوبنا أقوى من صوت الدفوف
ولسان بينطق كلمة من أربع حروف
حرية.. أوهامنا راحت وأحلامنا جاية
خلاص يا بلدى آن الأوان سامحينا كان
لازم ولادك يعملو كدا من زمان
المكان مش مجرد كان ميدان
ده جوا قلب كل مصرى يوم محسش بالأمان
خلاص يا بلدى السلاسل اللى كانت من حديد
فكهالك كل واحد كان ما بينا ومات شهيد
مات عشان يفضل ترابك يا بلدى حر
مات عشان كل اللى بعده ميدقش مر
بس دورك يا اللى عايش مش أقل
البلد دلوقتى بلدك كل حاجة فيها ملكك
يبقى لازم يا ابن بلدى تعمل بأصلك
وإن تغيير النظام مش مجرد بالكلام
قوم وشارك واوعى أبدا يوم تنام
قبل ما توصل ببلدك بر السلام
الخير كتير بس عايز الاهتمام
ازرع فى أرضك قمح بلدك
اللى كنا بنشتريه شوف بكام
امسك مقشة ده لو شلت قشة هتفرق أوام
نضف شوارع كان مليها هم وآلام
ابنى بلدك من جديد طوبة فضة وطوبة ماس
وعشان فيها تعيش سعيد اوعى تنسى تبنى الأساس
ولو لقيت غيرك بيسرق أو بينهب
قول له لا يا ابن بلدى ده مال حرام
دى بداية شعب حر بس لازم الالتزام
واوعى تنسى وسط الزحام
إن زى ما بينا عامل أو مهندس أو حتى فلاح بسيط
بينا ظابط قضى عمره يخدمك من هنا لأقصى الصعيد
يعنى لازم نطوى صفحه اتكتبت سطورها غصب
لازم ايدينا تبقى واحدة واللى بينا يبقى حب
واللى فينا مرة يغلط هيكون عقابه مش بقسوة أو بضرب
هيكون شعار شرطة بلدنا هو خدمتك يا شعب
يلا يا مصر شدى حيلك عايز أرد لك جميلك
واكتب جواب يطير يجيلك سطوره هى عشق البلد دى
ومين يا ناس فى الدنيا قدى بلده هى أم السلام
وفى نهاية الكلام كل واحد حر فينا
لجيش حامينا كله عزة واحترام
يقوم أوام يضرب معايا تعظيم سلام