|
فزورتى ف حكايتى
السلام عليكم
اخوانى الافاضل اعضاء وكل كوكبة قيثارة المنتديات منتديات المهندسين العرب اليوم اول ايام الشهر الكريم اعاده الله علينا جميعا بكل خير يسعدنى ان تكون فوزرتى فزورتى ف حكايتى هذا العام تكون بشكل جديد ولا توجد فكرتها الا هنا وفقط اتمنى لكم جميعا صوما مقبولا وافطارا شهيا وحل لفزورتى وبشكل صحيح وذلك بفتح موضوع لحل الفزوره به كل يوم بالرابط ادناه http://www.mohandsen.net/vb/forumdisplay.php?f=40 وكل عام وانتم بخير الفزوره الاولى ياسلااااام عليه الله عليه صاحب اكبر واعظم رحلتين ولسان حلو وعذب اصله الامين لدرجة انه مره قال لو بنتى سرقت اقطع اديها وكمان معاه رساله قويه واحلى دستور لكل البشريه كلام جميل كلام معقول كلام تحتار من حلاوته البشر ياسلاااام عليه الله عليه اصل يا جماعه اخر العنقود سكر ايه وحلاوة ايه الله عليه الله عليه ياطرااااا مين شخصية حكايتى ؟ |
رد: فزورتى ف حكايتى
الفزوره الثانيه
النهارده حكايتى غير اى حكايه حكاية مكوك فضائى انما ايه قمه فى التكنولوجيا لا تقول امريكا ولا اليابان دا مكوك من صُنع الرحمن مكوك يخترق المعقول والا معقول يوصل بسلام للارض ولا يهمه حر ولا برد مكوك بينزل باحلى قصص واحلى كلام يفيد البشر ياطرااااا مين شخصية حكايتى ؟ |
رد: فزورتى ف حكايتى
الفزوره الثالثه
النهارده هتكلم عن راجل فلاح اتولد سنة 1911 بقرية دقادوس مركز ميت غمر مديرية الدقهلية حفظ القرآن وهو عنده حضاشر سنه واول تعليم اتعلمه كان بمعهد الزقازيق الدينى الأزهرى أبتدائى وثانوى الراجل دا ياجماعه اول ماتشوفه تحبه يقنعك باسلوب سهل وبسيط بخواطره الشفافه يفسر مهما يفسر تفضل تسمعله و ماتزهقش والصعبه يسهلهالك والكلمه يفصصهالك ياطرااااا مين شخصية حكايتى ؟ |
رد: فزورتى ف حكايتى
الفزوره الرابعه
عظيم بمعنى الكلمه استاذ للتاريخ اليونانى وكمان مايسترو للتاريخ الرومانى اصله عُمده وعميد وعلى هامش سيرته تعالوا نسمع دُعاء الكروان فحديث الاربعاء لازم يبقا عندنا نظر ونفكر فى اللى نظره انكسر الراجل دا منياوى من مغاغه وعزبته اسمها (الكيلو) وصاحب فضل للمثقفين والمتعلمين ياطراااا مين شخصية حكايتى ؟ |
رد: فزورتى ف حكايتى
الفزوره الخامسه
النهارده بقا صاحبنا دااا كان طالب منعزل وهو فالجامعه كل اللى عليه يشترى كُتب وبدرس فلسفه بدايته كانت صحاااافه شويه فالاخبار وشويه فالاهرام من المنصوره الراجل داااا ياجماعه وبصراحه نبغه بجد فمهنته وادبه غير انه كان لبلب يتكلم انجليزى وفرنساوى والألمانية والإيطالية واللاتينية والفرنسية وكماااان روسى ولف العالم في 200 يوم اصل بلاد الله لخلق الله وطول مانت غريب في بلاد غريبة ياما هتشوف أطيب تحياتى من موسكو اصله ياجماعه شاف أعجب الرحلات في التاريخ ياطراااا مين الشخصيه اللى ف حكايتى ؟ |
رد: فزورتى ف حكايتى
الفزوره السادسه
النهارده بقا هتكلم عن شخصيه غريبه راجل العقل اللى فراسه افكاره مُريبه حاقد وجحود وامعه ماكر بدهااااء الافاعى ومفكر انه ال ايه .... عموما مفيش داعى كفايه عليه وقعة بدر بعد بسبع ليالي بالظبط جتله ياحبائى ( العدسة ) مرض خطير يكفينا الشر وبقا تلات ايام محدش يقرب منه طبعا خايفين من العدسه اصل ياجماعه العمر مش بعزقه وراحو فحتله حُفره ورموه فيها ومات ومحدش قرب خالص منه يستاهل بصراحه بسبب اللى عمله ياطراااا مين شخصية حكايتى ؟ |
رد: فزورتى ف حكايتى
الفزوره السابعه
الراجل دا بقاااا دبلوماسي و شاعر اتولد في دمشق من عائلة دمشقية عريقة جدا جدا ورث الحس الفني المرهف والغريبه ياجماعه انه لما كان صُغير كان بيحب يفكك اللعَب واى شىء ااال ايه بيدور ع المجهول وكمان عمه ياجماعه شاعر ومؤلف وكمان ملحن نرجع لشخصية فزورتى هو اللى قال ان السمراء قالتله وكان بيكتب الشعر التقليدي وبعد كدا الشعر العمودي وكمان كان ناقد سباسى فهوامش على دفتر النكسة وحبيبتي والرسم بالكلمات ياطراااا مين شخصية فزورتى ؟ |
رد: فزورتى ف حكايتى
الفزوره التامنه
النهارده شخصية فزورتى نبغه وبجد اصوله دمشقيه لكن جد من جدوده رااااح للبنان وواسع الخيال ياجماعه ونبغة كُتاب المجهر احكى ايه والا ايه عنه اصله شاف المُرين ياعين امه كفايه انه صاحب الدمعه والابتسامه والارواح المُتمرده والاجنحه المنكسره كفايه كدا ياجماعه ياطرااااا مين شخصية فزورتى ؟ |
رد: فزورتى ف حكايتى
الفزوره التاسعه
الفوازير هنا وبس لا تقولى دى فوازير منقوله من منتديات خطيره لااااااااااااا دى فزورة مدحت الجزيرة راجل ولااا سيد الرجاله فلاح ابن فلاح ورث الطااار من اصحابه اصله حُر مع شوية احرار ولو يلبس كابه بيبقااا حكايه لاتقول هتلر ولا موسلينى تعظيم سلاااام يابشر للى هد بناسه اقوى خطوط الحجر لمااا اداااهم العلقه اياااها وبعزة نفس اعد وياهم وفهمهم ان العيشه معاه ومعانا لازم تكون بدون لف وتتكتب حرف حرف الله عليك ياولد الله ربيت ابو ايد طويله الله فخناااقه وسلام وبعدهااا اخدت احلى وسام ياطراااا مين شخصية حكايتى ؟ |
رد: فزورتى ف حكايتى
الفزوره العاشره
الراجل دا من اسكندرية اتولد في كوم الدكة وأبوه كان نجار بلدى وبعد ما تعلم يقراا ويكتب حفظ القران واول مالبس ملابس الائمه امه اوااام زغردة وبعد كدا ابوه مات راح سايب تعليمه واشتغل بتاع كانتو ومساعد بياع دقيق ومساعد مبيض نحاس بس كان غاوى اغانى وهو شغال بالمغنى هاوى وبالاغانى كان للعمال حماس وف مره ع الرصيف لقا كتاب مع بياع كتب كتاب كان كله موسيقى وبانت خلاص الموهبه وهو اللى قال يوم تركت الحب كان لي في مجال الأنس جانب ورجع لي المجد تاني بعد ماكان عني غايب واول حفله كانت له فى مقهى الكونكورديا تعالو كدا نقرااا ادواره يا فؤادي ليه بتعشق و يللي قوامك يعجبني و في شرع مين و الحبيب للهجر مايل و أنا هويت واوعو تنسوا كمان ان فى اى مناسبه تقول بلادي بلادي بلادي ياطراااا مين شخصية حكايتى ؟ |
رد: فزورتى ف حكايتى
الفزوره الحادية عشر
الراجل دااا بقا ياجماعه اتولد فى دمنهور ومنها انتقل لدسوق عشان ابو كان شغله هناك ولما خلص ثانوى راح اسكندريه ودخل كلية العلوم اصله غاوى كيميااااا وكيميته مش زى الكيميااا اللى بين الاحبه كيمياا بجد محتاجه منه مشاقه واشتغل مندوب لشركة شل ومعجبوش الحال راح رايح امريكااا وخد منها الدكتورااااه من جامعة بنسلفانيا واواااام ضموه ولاااد الهرمه لفريق ابحاث وعينوه كمان مساعد استاذ وفضل يكافح ويكافح لحد ما بقا الاستاذ الاول عندهم واوااام اترشح لاعلى وسام وجوايز تانيه كتير كتير ياطراااا مين شخصية حكايتى ؟ |
رد: فزورتى ف حكايتى
الفزوره الثانية عشر
الراجل دا واحداً من زعماء مصر وله شعبيه محدش خاد زيها لحد ما لُقُب بزعيم الأمة وزوجته بنت الباشا بأم المصريين اتولد ببلدة أبيانه بالغربية اللى هى كفر الشيخ حالياً مارس المحاماة تسع سنوات فأبدع ولمع اسمه واسمه لمع جدا جدا بعد الحرب العالميه الاولى بس العسكر البريطان حبسوه من اللى كان بيعمله لحد ما بقا الشراره الاولى لغضب الشعب الغضب اللى اعتبره الكل اول غضب شعبى بعد الحرب ياطراااا مين شخصية حكايتى ؟ |
رد: فزورتى ف حكايتى
الفزوره الثالثة عشر
الراجل دا له اسم فنى بديل لاسمه راجل مصرى من المنصوره بس راجل بجد راجل تمام دا حتى كانوا بيدوروا على واحد زيه يقوم باللى عمله ويجيب اللى جابه شغل زى بتوع المباحث واكتر بكتير وبعتوه العتاوله اللى محدش يعرف يغلبهم بذكائهم بعتوه كاْنه واحد منهم بخطه مُنظمه جدا جدا وعمل هناك مصالح تجا رية و اسعة ونا جحة وأصبح من الناس البارزه عندهم وذودنا ابن الايه بمعلومات خطيرة عنهم اصله من دمياط ياجماعه وناس تانيه بيقولوا من طنطاااا وبعد صراع رهيب مع السرطان مات الله يرحمه في مدينة بفرانكفورت بألمانيا ودفن فيها ياطراااا مين شخصيه حكايتى ؟ |
رد: فزورتى ف حكايتى
الفزوره الرابعة عشر
اتولد في القاهرة والده الذي كان موظف ولم يقرأ كتاباً في حياته بعد القرآن التحق بجامعة القاهرة وخد ليسانس الفلسفة وشرع بعدها في إعداد رسالة الماجستير عن الجمال في الفلسفة الإسلامية ثم غير رأيه وقرر التركيز على الأدب بدأ الكتابة في منتصف الثلاثينيات بنشر قصصه في مجلة الرسالة وكانت عبث الأقدار اول ما فحياته غير السراب ياجماعه والحرافيش فى ليالي ألف ليلة عجبنى بجد بجد لانه من ولاد حارتنا ياجماعه الحاره اللى كانت العالم كله بالنسباله وعشان كدا خد اعلى وسام ياطراااا مين شخصية حكايتى ؟ |
رد: فزورتى ف حكايتى
الفزوره الخامسة عشر هو وأحد من شعراء العصر الحديث تألق في شعره باللغة العربية الفصحى والعامية وتمتع شعره بالسلاسة وعذوبة الألفاظ ورقة الأحاسيس اتولد بحي السيدة زينب وكان أمين مكتبة المدرسين العُليا وكان دايما حريص على حضور المنتديات والمجالس الشعرية وراح بعثة دراسية إلى باريس لدراسة اللغات الشرقية وفن المكتبات فحصل على شهادته من جامعة السوربون وكان أمينًا للمكتبة بدار الكتب المصرية ياطراااا مين شخصية حكايتى ؟ |
| الساعة الآن 03:57 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir